سيدنا هضر بالصبليونية مع سانشيز.. وقالو: شحال هادي ماهضرت فالتليفون مع الملك فيليبي
اسماء غربي – كود//
مصدر دبلوماسي صبليوني هضر على الدقيقتين اللولين بين سيدنا وسانشيز.
وقال المصدر ان الملك محمد السادس استقبل بيدرو سانشيز وباقي الوفد فالقصر ديالو، وسلم عليه. وفبداية الاجتماع، تبادل سيدنا ورئيس الحكومة الاسبانية هضرة باللغة الإسبانية.
وسلم سانشيز لسيدنا تحيات الملك فيليبي والملك رد عليه أنه شحال هادي ماهضر معه فالتيليفون.
ورد سانشيز بأن الملك غايفرح بالتحدث معه لأنه عندو مودة خاصة للمغرب والملك. وقالو أن فيليبي كيتذكر بشكل خاص الزيارة الرسمية اللي قام بها إلى المغرب مع دونا ليتيسيا.
