دبابة من نوع “بوغطاط” قصفت المهداوي
De // NaBae 24
حميد المهداوي كان داير فيها ذكي أكثر من القياس و عايق أكثر من لمغاربة و نزق بلا حدود. هو لي عند راسو واعر فالكلاش و فحشيان الهضرة وفقليان السم وفالتقلاز من تحت الجلابة.
المهداوي ماعرفش أن الأسلوب ديالو مفروش ومفضوح ومايع…. “هاد المسؤول تيقولو عليه معقول وخا شي وحدين تيقولو عندو فيرمة وفيلا وطوموبيلا فإسم مراتو….هاد القاضي سولت عليه قالو عليه نزيه و حدودي وخا شي وحدين تيقولو عليه قصايري من تحت الدف….هاد رئيس الجماعة تيبان لي نظيف رغم أن بعض الناس تيقولو عليه ماساهلش وكيقبط الرشوة من تحتها..” هادي هي طحرميات ديال المهداوي يكوي و يبخ..يلاقي السلوكا ويهرب.
المهداوي دار بحساب كولشي إلا بحساب واحد السيد سميتو بوغطاط. هاد بوغطاط دار فقط خاوية فعامرة للمهداوي و ضرب ليه فالصفر “الذكاء” والمكر ديالو و رجعو سادج و وتافه وحشمنا نقولو بليد. بوغطاط مادار والو غير حط تصويرة ديال المهداوي مع الصور ديال واحد رباعة ديال المعارضين الإلكترونيين فيهم الإرهابي حاجب و كبير النصابين زكريا المومني وعطاي الجزائر العيدودي وغيرهم.
وحيت رأس مال المهداوي غير الهضرة خرج كيدافع على راسو وتيقول أنه ماشي مع هاد البانضية وbla bla bla…المهداوي قال كولشي إلا حاجة وحدة لي عارفينها كل لمغاربة..ماقدرش يقول مباشرة على حاجب إرهابي ولا على المومني نصاب فقط كيفما قال القضاء المغربي فحقهوم. هاد القضاء الذي يدعي المهداوي أنه يحترمه.
المهداوي المنافق أسابيع وهو حاط على واحد الناشط حقوقي عايش فمالقا (إسبانيا) وعلى واحد اليوتوبر مهاجر فأمريكا وما خلى ما “فضح” فداكشي لي كانو تيقولو هادو فرموز الدولة المغربية قبل ما يتوبو. ولكن المنافق منين تكلم على حاجب و وزكريا المومني ماقدرش يجبد الانزلاقات الكلامية الخطيرة فحق ملك البلاد ديال هاد النصاب وهاد الإرهابي. المهداوي الأناني كان الهم ديالو هو يفك راسو من هاد البانضية و يخلي شعرة معاوية معهم.هاد الميساج وصل لحاجب والمومني لي خرجو حتى هما جاوبوه ولكن بالصواب والآداب.
وحيت المهداوي فهامتو على قد عقلو كان قال فالخرجة ديالو أن بوغطاط سقط ف “شر عمله” منين دار تصويرتو مع دوك البانضية لأنه هو “مشهور ومعروف و عندو قناة جماهيرية” وبالتالي لمغاربة غادي يمشيو يشوفو القنوات ديال حاجب و المومني والعيدودي..يعني أن بوغطاط أسدى خدمة إعلامية مجانية لهاد البانضية لي غادي تخلي لمغاربة يتعرفو عليهوم دابا. المهداوي الساذج ما عرفش أن لمغاربة عارفينهوم مزيااان منذ زمان ومامسوقينش ليهوم بكل بساطة لأنهم أساءوا كثيرا بالقول لمؤسستهم الملكية.هاد المؤسسة الشريفة التي يدعي المهداوي احترامها وتقديرها.
في انتظار “خاوية فعامرة” أخرى ديال بوغطاط ننصح المهداوي يراجع راسو ويعرف أن أسلوب التقلاز من تحت جلالب ديالو مفروش.ماكاينش عدمي و نص عدمي أو معارض و نص معارض غير يخرج ليها نيشان. وفالأخير وليس آخرا ننتظر المهداوي يخرج يجاوب على التبهديلة لي دارت ليه لبنى ديال الحياة اليومية لي فرشاتو وعايراتو وطلبات منو يعطي التيساع لزيان ومايبقاش ياكل فلوس اليوتوب على ظهر هاد المسجون أو من على شاكلته.
