“نايضة” بين المهداوي و المومني
كيفاش المومني شمت المهداوي وبغا يدوز على ظهرو قصة واحد “الكادو” غامل…
زكريا المومني ما تسرطاتش ليه الخرجة ديال حميد المهداوي لي عايرو فيها وقاليه خبيث و مبتز يعني نصاب. زكريا هدد و توعد المهداوي أنه غادي ينتاقم منو ويفضحو على أساس أن المهداوي كان على تواصل معه وكان دافع عليه بل و روج للقضية ( الكاذبة) ديالو فالموقع ديالو “كذب أنفو” (بديل.أنفو).
الأكيد أن الخاسر الكبير فهاد “الكلاسيكو” ديال خونة اليوتوب هو المهداوي لسبب بسيط أن المومني و أمثالو دايرين عداء مؤدى عنه وبطريقة مباشرة للمؤسسات الوطنية في حين أن المهداوي داير فيها “التقية” تحت إسم حرية التعبير وتحت شعار شعبوي خاوي سميتو “خوتي لمغاربة”.
شنو خلا المهداوي يتواصل مع واحد لا شغل له سوى سب الملك ورموز الوطن؟ شنو خلاه يكذب ويقول أنه تواصل مع المومني قبل سنوات في حين أنه كان على تواصل معه إلى حدود السنتين الأخيرتين؟.
المهم أن المهداوي حط راسو ف “مسافة الصفر” مع أعداء الوطن ليس ضدهم ولكن معهم ومع أفكارهم وأكاذيبهم التي انكشفت للمغاربة جميعا لذلك المهداوي يستاهل التبهديلة والشوهة لي تايديروها ليه الشمايت بحال المومني وغيرو.
وحيت المهداوي “شماتة” وحيت زكريا المومني كذاب ونصاب محترف حاول يستاغل الفرصة ديال “الحرب” ديالو مع المهداوي مول “المليون مشترك ” فقناة “بديل” وطاحت عليه كذبة جهنمية بغا يدوزها على ظهر “الشماتة” ديال المهداوي. المومني جاب كذبة جديدة قاليك أسيدي هاديك العشرة “ألاف أورو” لي تسلمها ف الأطوليل المعلوم من عند داك المسؤول الأمني المعلوم كانت فقط عبارة عن “هدية” يعني “كادو” عطاه ليه المغرب. يا سلام هاد الكادو عاد بان من بعد سنين ديال الكذب والزور؟ البارح كانت سميتو تسبيق و دابا كادو؟ و منين هو كادو مالك كونتي كتقلب على الميكرو؟ ومنين هو كادو قولها النهار لول؟.
“خوتي لمغاربة” الكذبة الجديدة ديال النصاب المومني غادي تزيد تبهدلو قدام لمغاربة..لمغاربة لي عمرهوم ينساو كيفاش كان زكريا المومني ومزال تايسب ويعاير ويكدب على الملك و على رجال الملك وعلى المغرب و لمغاربة.لمغاربة لي شافو المومني كيحسب لفلوس و هو فرحان وعرفوه جا للمغرب بخاطرو و هو فرحان ولكن منين بغا يلعب اللعب الباسل لقا المغرب ما كيلعبش وما كيخضعش للابتزاز….لمغاربة شافو العين الحمرا ديال المغرب مع ألمانيا و فرنسا وإسبانيا عاد غادي يتسوقو “لسراق الزيت” من أمثال زكريا المومني أو الكوبل الفلالي او حاجب أو “بوتعاسة” أو غيرهوم…الحاصول المهداوي حصل فيها مع المومني. هذا هو “حب الأفاعي” وهذا هو “كلاسيكو الخونة” ما ظهر منهم وما بطن.
