كاركاتير..مقتل حسن نصر الله يُميط اللثام عن المتشيعين الجدد بالمغرب
De // NaBae24
مطرب الحي لا يطرب، و مآسي بلادنا مكثيرش بزاف شهية نشطائه. من زلزال الحوز و مرورا بفيضانات طاطا إلى الهجرة الجماعية بالفنيدق، ماسمعناش للطوابرية حس تقول غير ماعيشينش معانا فهاد الأرض و ممشاركينش معانا أوكسيجنها ولو أنهم إكتفوا بالسكات كون هضمناها ودوزناها بجغيمة الما ولكن مع الأسف شفنا من هاد الناس نشاط و دفاع مستميت عن بلدان و قضايا بعاد علينا بعد السماء عن الأرض.
ولو أن الأمر متعلق فقط بتضامنهم مع حماس و غزة وأهلها كون تفهمنا هادشي وقلنا ماكاين باس نظرا للحمولة الدينية للقضية الفلسطينية، ولوكان إكتفوا بالتعاطف مع الشعب اللبناني لقلنا من باب الإنسانية لكن أن يقيموا القيامة من أجل وفاة إرهابي سفاح فهاد شي كيخلينا نطرحوا بزاف من الأسئلة، أولها من إمتا كنتعاطفوا مع القتلة السفاحين؟ و ثاني سؤال و كنتمنى الأخ حسن بناجح عن جماعة العدل و الإحسان يجاوبوني عليه من إمتا وليتو شيعة و كيفاش كتظاهروا من أجل واحد الإنسان إذا ماقلناش عليه مشرك غنقولو يطعن في أم المؤمنين رضي الله عنها و أرضاها وفي شرفها و ربي برأها من سابع سموات هذا بلاما نهضروا على السب ديالهم للصحابة رضوان الله عليهم أجمعين أم أن أنكم إخترتم الدنيا و زينتها وأحباء خير البرية ليهم الله؟ بدلوا لينا الكونسيبت ديالكم وخرجوا ليها طاي طاي والله حتى نحتارموكم.
ماعلينا أنا لي جاني بيزاغ فهادشي كامل هو التعظيم و التقديس المهول لي بينو عليه المنشطين الحقوقيين ديالنا لشخص السفاح حسن نصر الله ماكفاهمش أنهم ولاو فلسطنيين أكثر من الفلسطنيين أنفسهم، و حيث لالة زينة و زادها نور الحمام الطوابرية تشيعوا كثر من الشيعة، وربما الشيعة براسهم غتلقى الأسوياء منهم ممتافقينش مع الجرائم القذرة ديال حسن نصر الله فحق الإنسانية، و هنا كنستحضر مقطع فيديو كنت شفتو لجنود ديالو و هما كيقطعو ريوس أطفال سوريين بلا رحمة ولا شفقة و كنتذكر واحد من دوك الأطفال كيفاش كيطلب و يرغب فهذاك الجندي و كيقولو “عمو رقبتي بتوجعني” و مع ذلك ماحنش فيه و قطع ليه راسو قدام خوه ولكم ان تتخيلو هول المشهد و فظاعته و كيفاش كيستلذوا بتصوير الفيديو، و اللي أكيدة منو هو أنه السيد بطش فالأرض و طغا و اللي خرج لينا و شفناه راه قليل بالمقارنة مع أفعالو، والسؤال المطروح هنا إمتى إسترخصتم دماء السوريين في سبيل تعظيم المجرم حسن نصرالله لعنة الله عليه؟.
بسم الله أرا كاميرا و جقر لينا كوفية وضرب لينا حطة خوانجية و هز لينا درابو فلسطين ولبنان و شي شوية الشعارات الخاوية وعمر لينا المظاهرة بعرام العيالات من بعد ماستغليتو أحساسيسهم العاطفية وقولي كناصروا المقاومة الفلسطينية و اللبنانية و حزب الله الإرهابي، وكنسمعوا لصرخاتهم وهادوك الفقراء و المحتاجين لي فبلادك شكون يسمع صراخهم إلا مغتستغلوش أنتما أصواتكم و تشوفو من حالهم و دافعوا عليهم شكون اللي غيدير هادشي أولا حيث ممعاعهمش طريف دالخبز ماعندكمش مع خدمة فابور و الله يجازيكم بالخير بغيتوها عملة صعبة!.
فالعادة و المتعارف عليه هو ان الشيعة ديما كيديرو التقية فاش كيدخلو على شي مجتمع كيختلف على المذهب ديالهم و لكن الشيعة ديال الطوابرية قرروا انهم يعلنوها بالفور يالشيفور و لو انهم ماقالوهاش كلاما إلا انهم بينوا عليها فعلا و الفعل أكيد أقوى من الكلام و هادشي كنا كنشوفوه شحال هادي فالضرب في سمعة المغرب والعمالة لأعدائه و خيانته و ماكناش فاهمين السبب علاش اليوم أميط اللثام عن حقيقة الشيعة الطوابرية وفهمنا سبب الحقد ديالهم على هذا الوطن اللي مكيلطمش على موت الحسين وكيعتبرنا خونة له لأنه بالنسبة للشيعة فالمغرب ملكا و شعبا بلد شيعي بالفطرة و إختياره للمذهب السني خيانة لعلي و الحسين، و عدم التعزية و اللطم في وفاة الإرهابي حسن نصر الله خيانة لهم جميعا.
الحصول بغاونا نعزيو فعدو أهل السنة و عدو المغرب إرهابي يتعاطف مع أعداء الوحدة الترابية الوطنية و يسعى لتقسيم بلادنا، يسهر على تدريب المرتزقة و يقدم لهم العتاد، بلا حشمة بلا حيا نصتبوه شهيد و بطل قومي و إتغاضيتو على كاع جرائموا فحق الإنسانية اللي دارها بتواطؤ مع إيران واللي أصلا كيفما ضحات بإسماعيل هنية ضحات بيه و بالرفاق ديالو فسبيل مصالحها، و اللي أكيد تانتما طالقين علينا هاد الهيلمان ديالكم غير باش تخطبوا الود ديالها و ضبرو على ريوسكوم
._ منقول _
