صياد النعام يلقاها يلقاها.. سخونية راس قنيبيلة/جيراندو بدات كترجع عليه بالبرودة.. وبالقانون
في إطار مقالاتنا لي كنفرشو فيها لي خاصو يتفرش، كنرحبو مرة أخرى معانا بصياد النعام لي غادي يلقاها يلقاها.. لي هو جيراندو الملقب بقنيبيلة .. راس مالو الكذوب والبهتان وتيلفون، بيطالي عايش فكندا وكيوكل ولادو الحرام.. مقابل الانترنيت وسارق الويفي من عند جارتو، ومقابل سيادو.. هاد المسؤول دار..لاخر فعل.هذا مشى هذا جا..هذا ما دارش.. هادشي كامل باش يقول لينا أنا هنا.. وكملها وجملها قالك المسؤولين لكبار كيجتامعو باش يهضرو عليا، والله حتى هذا قنيبيلة نيت، شد يا فم وقول خصوصا مع قلة الشي واللسان ما فيه عظم، وما حد كاين اللي كينفخ ليه فوذنيه ويعطيه معلومات غالطة باش ياكل بفمو الشوك.. .ولكن باش توصل يجبد الأمن، الجدارمية، القضاء، الإدارة الترابية مع الفطور ومع الغدا ومع العشا، هذا راه يا إما عندو متلازمة سميتها المؤسسات، ربما كان كيحلم يولي يكون عندو شأن بحال سيادو، يا إما مخلص من عند العديان مزيان يا إما جوج في واحد..دوبل روشارج.
هاد قنبيلة واقفين ليه المسؤولين الأمنيين والقضائيين والاداريين شوكة في الحلق، رغم ان هاد الناس ماعلبالهومش مثل هاد الطفليات اللي نبتات وسط مواقع التواصل الاجتماعي وامتهنات الابتزاز والتشهير.. الناس خدامة خدمتها وكتأدي الواجب ديالها بضمير ووطنية وكتبني البلاد كل من موقعه.. المعقول و حب الوطن.. فمثلا المؤسسة الامنية السيمانة الفايتة شدات خلية ارهابية فحد السوالم كانت قريبة من تنفيذ عمليات إرهابية غير ربي ستر واليقظة ديال هاد المؤسسة والحنكة ديال العناصر ديالها، راه القافلة تسير والكلب جيراندو ينبح.
المغرب صبر على هاد المعتوه لعل وعسى يرجع لعقلو.. ويثوب من البلية اللي فيه.. لكنه ما بغاش هاهي الوكالة القضائية للمملكة دخلات على الخط وقررات ترفع دعاوي قضائية امام القضاء المغربي القضاء الكندي ضد هشام قنيبيلة بسباب هاد الكذوب والتشهير اللي كيدير فحق المسؤولين القصائيين و الأمتين و الترابيين والمواطنين المغاربة، ما خلا حتى حد في وقرو، باش نشوفو هادشي اللي كيقول عندو عليه شي دليل ولا سخونية الراس غترجع عليه بالبرودة، واخا كلشي عايق بكذوبو، وهادي ماشي اول ولا ثاني مرة فين كيتفضح امام القضاء الكندي، وديك الساعة يبان الحق من الباطل، ونعرفو دوك اللي كياكلو الشوك بفمو باش غادي ينفعوه؟أما ايلا كانت المتلازمة هي لي فيه را نديوه يتعالج في أحسن مستشفى الأمراض النفسية..
هادي اللخرة ليك ا قنيبيلة.. وقت اللعب والتفلية سالا وجا وقت المعقول.. الدولة غادا معاك قانونيا.. وغتخلص اخطاءك بالقانون..و بالفور يا الشيفور
يتبع..
# الفرشاوي
